الف ليلة وليلة من مصر ...اصول اللعبة

الف ليلة وليلة من مصر
ولما كانت الليلة السابعة بعد وقوع الفاجعة ...افاقت شهرزاد علي افكار موجعة
فملك البلاد ترك القصر في غير الاوان والميعاد
وفوجئت به علي شاشات التلفاز يخاطب العباد ويعدهم بتلبية طلباتهم والانجاز...
وانه للحق سينحاز...وانه يكتفي بما حقق من انجاز...وبعد قليل
وجدته يدخل القصر وقد ظهرت عليه علامات الهيبة و والانبهار ..
وبصحبته نائبه الجبار وهو يحيه علي ما اتخذه من قرار...
ويؤكد له انه لن يضطرونه للفرار ..فهو قائدهم المغوار وانه علي خطاه سيكمل المشوار..
واستئذان القائد الجديد وهو يكيل السباب والتهديد لولاد الايه ويتوعدهم بقيادة البلاد بقبضة من حديد...
عندها اشار ملك البلاد لجاريتة شهرزاد ..
فلبت طلبه في الحال واسرعت اليه دون جداال..فأتكأ كعادته وقربها من سيادته..فبادرته متسائلة عما حدث ؟؟فألتقط احدى ثمار البرتقال واخذها يتقاذفها بين يديه..
وقال انها اسس اللعبة يا لوزة ارتضيتها منذ لبست الخوزة...
ان لكل مقام مقال ولكل حدث عوزة...
وها نحن الان
في منتصف الميدان ولم ولن اكون يوما جنديا هاربا جبان...
وها نحن قد وصلنا الي مفترق الطريق الذى يظهر العدو من الصديق...
واما ان يقبلوا ما قد طرحناه من مقومات العهد الجديد ...واما يطرح اخر ما لدينا من اوراق اللعبة...اما تدبير انقلاب للجيش ويشبع الجميع تلطيش ويبقي شقاء هذا الشعب علي مفيش...واما وسكت مولانا برهة كاد ينخلع معها قلب شهرزاد وهي تتساءل واما ايه يا مولاى...فربت علي رأسها وهو يقول واما ان نفض الولد ويعلن وفاة ملك البلاد...
فتهدأ مشاعر العباد وتسيير شئون البلاد كالمعتاد
فنظرت اليه شهرزاد وقد امتلئت عيونها بالدموع وهي تقول فليرحمك الله يا مولاى

الف ليلة وليلة من مصر ...اللعبة

ولما كانت الليلة الاربعاتاشر من بعد الخمسمية اسرعت شهرزاد الي ملك البلاد وعيناها منتفخة من الارق والسهاد...وما ان رأها مولانا حتي هب واقفة من الرقااد...وبادرها متسائلا خير مالك يا شهرزاد ؟..حدمضايقك من العباد؟؟..فردت شهرزاد وهي ترتجف الحق يا مولانا هيولعوا في البلاد..فاطلق مولانا ضحكة قوية واشار لها بالجلوس...يا شيخة بلاش هواجس وابعدى عنك الوسواس؟؟..فردت شهرزاد متعجبة ازاااى يامولاى؟؟بقولك فيه ثورة من الناس...وهنا التقط ملك البلاد سيجارا متوهجه وابتلع منها العديد من الانفاس...نفخها في الهواء فخلف وراءها سحبا متبلدة..وقال شوفي يا دكترة انتي لسة صغيرة والسياسة بحر واسع محتاج خبرة مش منظرة..فمصمصت شهرزاد شفتاها وقالت شوف ازاى؟؟..فأسترسل مولانا في حديثه قولتيلي ازاى..السياسة يا لوزة مش قعدت نت ولا شورب جوزة..لما وصلتنا اخبار ابن ام علي وانه انضرب زومبة وهرب...عقدنا اجتماع لأخذ المشورة في كيفية السيطرة علي غضب الرعاع...وانتهي الرأى الي!!! فكرك قررنا ايه؟؟..فردت شهرزاد من فورها طبعا هتقولي سياسة تفريغ البلونة عشان تبعد عن الناس اي افكار مجنونة...فانفلتت من بين شفتيه قهقهه مدوية احست معها شهرزاد ان اسقف القصر لابد هاوية..وقال مش قولتلك لسه صغيرة ده كان ينفع زمااان اما الان يجيب فللتان.فردت شهرزاد قسم وسمعني يا معلم...فاستطرد مولانا الطريقة الجديدة تفك العقد وتخلي مشاعر الناس علي الحديدة ....الا وهي طريقة الحرامية..فانطلقت صرخة من فم شهرزاد هتسرقوا العباد هما بقوا حيلتهم حاجة غير الكرامة والولاد...فرد ملك البلاد مسرعا نسرق ايه هما بقي حيلتهم حاجة.. لأ ده اسمها بس..وهي تتمثل في حركات معارضة من اللي بالك فيها اللي كل ما تولعها نطفيها ...يعني واحد يقفل وواحد يشغل الزبون واحنا نقلبه...مشيت وطابت نقسم الغلة علي كل الشلة ..اتقفشنا تبقي شوغلة المعارضة الهيصة والتطفيش عشان البوليس ما يجيش ونلحق نخلع هربا من التلطيش ...فردت شهرزاد ان بطش ربك لشديد
الخميس 27 يناير 2011د

التمن ايه؟

وهنا امسك المستكاوى مطرب مصر الأول والأخير ربابتة ...وقال جبل الكلام والعلام صلوا علي النبي العدنان..

انا لا جولت بارادعي ولا مبارك ..ولا جاى ازيط وابارك..ترمترمتم.. 

انا جاى اجول رأى واشارك..عشان عيالي وعيالك..ترمترمتمم..حط العراق من جدامك..تعرف البيعة جايه منيين..ترمترمتمم..

جالو العراق فيها نووى والأخ قاعد مستهوى..جوة الوكالة اتناشر عااااااااااام اتناشر عااااام ..ترمترمتمم..

طيب ما فيها ديمونة قالك اثارها مأمونة ..عايزين رقبة مضمونة ..اسمع وجولي صدام فييين صدام فيييين..ترمترمتمم..

ومش الوكالة لوحديها باعت العراق بأراضيها ..عندك كمان من حكامك خافت زمان علي كراسيها باعت العراق بأهاليها ..اسمع وجولي التمن ايههههههه التمن ايههه..ترمترمتمم..

ومن خيبتهم جال جايين وفي الرئاسة مترشحين ..فاكرينا طالينا مش فاهميين ..الهمة ديه جاية منين..ترمترمتمم..

اللي هيقدر يرجعلي كرامتي و اهلي في العراق و السودان..ويمنع عنا شر الصهاينه وبتوع ايران..ترمترمتمم..

هانزل اهتف له في الميدان واجوله انت ريسنا ..ترمترمتمم ..وغير كده تبقي اوهام ومش عايزنه نخطي لجدام...ترمترمتمم...

عايزنه

ليهم عبيد خدام ..وده مش هايحصل ..ترمترمتمم

احلام فليفوس ...يكتبها سلامة الياس

كان لي صديوقن فليفوس بأحوال السياسة مهووووس.....رأيته يوما وكأنه ملبوس.....لونه مخطوف وعوده ممصوص.....سالته ماذا حل بك يا فليفوس ؟؟ فأجابني وهو يرتجف ولسانه بالكلام يتلعثم وينحرف.....شفت كابوس شفت كابوس......قلت احكي وفضفض يا موكوس......فاستطرد في صوت مسموع وعينونه تترقرق فيها الدموع......حلمت اني مزروع في مكان تحتشد فيه الجموع.....سألتهم احنا فين؟؟؟ قالوا ده مولد سيدك التغيير يا فليفوس....قلت مدد يا بيبي مدد.....ومشيت وسط الجموع .وفجاءة سمعت صوت مسرووووووووووع .....بينادى في الجموع قرب قرب هنا السيرك السياسي....علي صدرها تغير علي شعرها تغير علي رجلها تغير....هنا السيرك السياسي.....لكل الناس اللي من الكبت بتأسي.....قرب وشوف من غير خدع وعلي المكشوف.....جريت بسرعه وانا ملهوف وقلتله اديني تذكرة يسترك.....قطعلي تذكرة وقاللي ادخل من الباب اللي ورا.....دخلت الخيمة الكبيرة وانا متخيل اني هلاقي ناس كتيرة.....فوجئت ان مافيش غيرى.....قلت يمكن انا دخلت بدرى ودلوقتي الناس تيجي تيجرى....ساعه ساعتين تلاته.....ومحدش عبرني ولا قالي انت فين؟؟خرجت وسألت في شباك التذاكر....هوه العرض هيبتدى امتي؟؟ فنظر الي مستعجبا وقاللي هوه مفيش غيرك انتي؟؟ ..استني لما الناس تتلم والعدد علي الكراسي يتم.....دخلت الخيمة تاني..وقعدت علي الكرسي الاولاني.....ساعه ساعتين تلاته.....بعدها لاقيت واحد عجوز ماشي تاتا ويقدم خطوتين ويأخر تلاته....قلتله ياعم امتي الناس هتتلم؟؟..قالي ياأبني بلا غم..من تلت سنين وان مستني الناس تتلم.....لا السيرك قدم فقراته ولا حد من بتوع التغيير ظهرت كرماته.....صحيت من نومي مخضوض..وهاتف بيقولي طريقك مسدود.....فكرك الحلم ده معناه ايه؟؟؟..هما بيضحكوا علينا ولا ايه؟؟؟؟؟؟؟؟؟؟؟

بصراحة كانت علي لساني كلمة في غاية الوقاحة بس بلعتها واثرت الراحة ..وقلت له روح يا فليفوس خد لك استراحة....وكمل حلمك وبعدين تعالي ....احكي اللي شوفته بصراحة....فغمغم في صوت خفيض ماشي مع اني حاسس اني هاجيب من الحضيض


اخيرا وبعد طوول انتظار جاءني صديقي الفليفوس ..ربنا يحميه ويبعد عنه الحسد والعوكوس..... وقد اكفهر وجهه..وتغيرت ملامحه الرقيقه و كأنه رأى بتوع التغيير من دقيقه....شعره منكوش و جسده مرعوش....لابس كرافته علي اللحم ووشه اسود زى الفحم.....فأجلسته بجانبي وندهت له القهوجي.....فسأله تشرب ايه يا باشا ..فطلب سحلب واربع حتت بوغاشه.....وبادرني قائلا منك لله يا أستاذ انت اللي خلتني اكمل الحلم وهيه دى النتيجه .....فسألته مندهشا هوه حلم ولا خناقه؟؟؟؟..قالي مش حلم ده كابووووووووووووووس كابوووووس......قلت له اهدى واضرب السحلب والبوغاشه واحكي يا باشا.....فنظر الي وقالي بتوعد ..احكي ماشي اسمع يا سيدى.....بعدما سيبتك روحت بسرعة وانا هلكان وقضيت ساعتين اقنع في نفسي عشان انام.....وفجاءه لقيت قدامي الباشا نظيف واقف في دراى كلين شيك اوووى.....محل تنضيف يعني....ومادد ايده ليه وعلي شفايفه ابتسامه صفراوية.....وقاللي اتفضل شويه.. انت رايح فين؟؟... قلتله رايح السيرك السياسي....وما ان اقتربت من باب المحل.... فوجئت بابو غالي حل.....وبص لي حتت دين بصه ورزعني قلم واتوصي.....وقاللي دفعت اللي عليك؟؟؟ولا علي السوق اوديك..وادبحك واشفيك وابيعك مخلوط بفريك....قلتله يا عمو احنا في حلم ومش عامل حسابي اقابلك.....ضحك ضحكة قويه وقاللي عملناها قبلك.....ولم ينقذني منه الا عمو نظيف لما ندهله وقال يا غالي تعالالي..وسيبه يروح السيرك وهوه راجع ابقي قلبه....



قلتله بدايتك سودة يا فليفوس حد يحلم باالغالي ونظيف مرة واحده....انت ضربت ايه قبل ما تنام.....فرد علي مستنكرا اضرب ايه؟؟انا مش بتاع الحاجات دى....وجريت من الحارة الي الشارع ...و في اخر الشارع لقيت السيرك منصوب والناس عليه بضرب الطوب....وما ان اقتربت من الخيمه اللي فيها السيرك.....حتي نده عليا موظف الشباك وقاللي خش من الباب اللي هناك.....دخلت السيرك لاقيته عمران بالناس اشكال والوان.....وكل واحد في ايده حبيتيين طماطم وبيضتان.....قلت اكيد القاعده هطول والكل عامل حساب الجوع....لو جعت اقوم اكل وبعدين انام تاني....شوية والنور انطفي ..... وصوت قوى بيقول ابتدى يا مصطفي....وانفتحت الستارة علي راجل تظهر عليه علامات الامارة.....واخذ يقول ايها السيدات والسادة محبي السيرك السياسي....الفقرات الموجودة عندنا مش هتشفوها الا هنا... في سيركنا حصري ي ي ي.....فنرجوا التركيز ومن اللب والتقزقيز..


قلتله بسرعه كمل يا فليفوس....قاللي ما تستعجلش يا استاذ مش دى شورتك المهببه.....المهم ظهر واحد لابس لبس الساحر وقدامه صندوق كبيييييررررر.....ومعاه بنت زى القمر ملفوفه بعلم مصر .....الساحر ادخلها الصندوق و غطاه بيافطه كبيرة مكتوب عليها احنا بتوع التغيير.... من غير فزلكه ولا تأوير.....ومسك سيف كبير ورشقه في الصندوق والبنت تتوجع....وهوه بيقول الحته دى للصهيونيه .....وبعدين غرس سيف تاني وقال والحته دى للشيعيه.....وغرس سيف تالت والحته دى قبطيه.....وغرس السيف الرابع وقال والحته دى نوبيه.....وبعدين بصلنا وقال طبعا متوقعين اني هاأجمعها تاني ده بعدكوا هيه كده ميه ميه......وخرج الساحر يجر صندوقه وراه....ولا يقطع سكون المكان سوى صوت المسكينة بتقول ااااااااااااااه.....وهنا ظهر واحد تاني لابس لبس البلياتشو......ومعاه 3 حتت لحمه ريحتها منتنه وكيس ورق.......وقال انا بقه بتاع المصالحه التاريخيه......وراح حاطط اللحمه المنتنه في الكيس.....وقال مش مهم شكل القط المهم انه ياكل الفيران......وخبط علي الكيس 3 خبطات......ومد ايده فيه فأخرج 3 قطط سمان .....وقال واحد للعلمانية وواحد لليبراليه والتالت للناصريه....ونطت القطط تجرى وهو يجرى وراها ..... والكل في حالة ذهول كاننا واكلين قنطارين فوووول.....ثم فوجئنا بواحد من بتوع التلت ورقات.....شكله ابن عز..من اكل البط والوز.....وقعد يفنط الكوتشينه ويقول الواد فين؟؟..الواد يقش..... احنا بتوع الحديد والباقي قش.....ثم اضيئت الانوار وظهر الساحر والبلياتشو و بتاع الكوتشينه.....علي المسرح عشان الناس تحييهم .....بصراحه انا كنت قاعد محتار دول يستحقوا التحيه ولا ضرب النار.....وفجاءة لاقيت طوفان من البيض والطماطم تغرق المتواجدين علي المسرح ...والناس بتقول..سيرك اونطه عايزين فلوسنا..اقولك الحق مالقيتش حاجه ارميها غير الكوتش الأديدس اللي انا لابسه .....فرميت الفردتين بعزم ما فيه كرمز للتحيه.....فكرك الحلم تفسيره ايه؟؟؟؟؟؟؟؟؟؟؟؟؟؟؟؟؟

البرادعي ساحراا

اخبرني فنكوش المنكوش انه كان في زيارة لمصر قبل الاحتلال الامريكاني بأيام قليلة .... وسمع عن شخص يدعي البرادعي....تتناقل الأخبار سيرته...وتتمني العيون رؤيته....ويتغازل الناس في عبقريته..... فقرر رؤيته (وضيع علي الولاد زيارة حديقة الحيوان) وبعد السؤال والتقصي....دله فاعلي الخير من ابناء مصر المحروسة....علي الأماكن التي من الممكن ان يتواجد بها البرادعي في حال تواجدة بأرض المحروسة ..... وحذروني من رجالة المخابرات الأمريكاني واغوات امن الدولة المدسوسة....ومنها قهوة المساطيل الشهيرة بميدان العتبة الخضرا...... وفعلا ذهب فنكوش لقهوة المساطيل.....بعد عناء ومشوار طويل..... ففوجيء بجمهرة من الغوغاء والعامة وبعض الوجهاء والمثقفين من الحاصلين علي الثانوية العامة.... ملمومين فيما يشبه الحلقة حول احد الاشخاص تظهر عليه مظاهر النعمة ....والعقل والنباهة بس من لا يعرفه يشعر انه ضائع في متاهة......فعينيه سريعة الدوران وكلماته سريعة الذوبان قبل ان تصل للأذان ....فأفترب فنكوش من الرجل اكثر فأكثر حتي يسمع ويستفسر.....فاذا بالرجل يهتف ويقول موسي نبي وعيسي نبي ومحمد نبي وكل اللي ليه نبي يصلي عليه... قلنا هنغير الدستور ونكشف المستور....وطلعنا بيان ومن وراه منشور....قالوا زن علي خراب عشه الدبور.....واصبحت من الكلام ممنوع ومحظور.....اترميت في حضن الأمريكان ...وياريت اللي جرى ما كان ....خللي بالك أوى من الغلبان واديللو من حلو اللسان ....والعب شوية بالدولار وشوية بلأخوان....ما نفعش الدولار ...ربطت مع الأخوان...وكتيير حذروني دول باعوا نور قبلك عشان كراسي البرلمان...ندمان والله ندمان وياريت اللي جرى ما كان ...بيضة للغلبان وكراسي مخصوصة للأخوان وسوده علي الالمان وبمبه مسخسخ للنسوان وهنسلمها مقشرة للأمريكان

طواريء الف ليلة وليلة

ولما كانت الليله التمن تلاف ميه..جلست شهرزاد امام ملك البلاد وهيه مستحيه.....وبادرته بسؤال ميه ميه......مولاى انت ليه مصر علي قانون الطواريء......وهنا اعتدل شهريار وظهرت علي وجهه علامات الجد بدون هزار .......وقال شوفي يا بت يا شهر زاد لما اذن رب العباد وقمنا بثورة في البلاد جد في البلاد طاريء فكان لابد من قانون الطواريء........عشان يخلصنا من اعوانا الثورجيه اللي مش هيرضوا بالاعمال اللي هيه..وللامانه العلميه مكنتش مصدق ان القانون هيجيب النتيجة ديه .......سيطرنا علي البلاد والعباد وتحملنا المسئولية ......وكلناها والعه مستويه..وكل التعابين دخلت جحورها مستخبيه.......ثم صمت شهريار فاحست شهرزاد بانهيار وخوف من طلوع النهار قبل ما تعرف مخطط شهريار......الا انه اخد نفسين طوال من الجوزة الكهرمان ونفس دخانه في الهوا باستمرار...... وقال..وبصراحة مليت من حالة الجمود السياسي وخفت علي الناس من الانفجار.....ونصحني رجالتي الاشرار......خفف الاحتقان شوية يا معلم وسيب اللي عايز يتكلم يفضفض ويلعلع ويتكلم ...الكلام ما بيلزقش.....قلنا ماشي.....واهو كله بثوابه......وهنا ادن الديك فغمغمت شهرزاد في امتعاض .....يا ربنا يهديك يا يوريتا يومين سود فيك

فارس تحت قبة البرلمان..مجموعة قصصية سياسية هزلية جداااا. ....يكتبها سلامة الياس

كيف تصبح نائبا في البرلمان 1

السيد فارس قبضايا احد اعضاء مجلس الشعب البارزين.. رووح قصره في المنصوريه بعدما قاله كلمتين جامدين عن مكافحة الحشيش والحشاشين.. وما ان دخل القصر حتي قابله الواد فايز القص (متخصص مزاج ساعاته وضيوفه... ميه.... دخان.. وخلافه ماتفهموناش غلط..) وقاله ايه يا باشا الكلام الجامد ده؟؟ فكرتني بحسنين باشا زغلول.. فتبسم فارس وساله حسنين مين ياواد ؟؟انتي بتقرا جرايد من ورايا!!.. القص عدل من هيئته و قال انا بتاع الحاجات دى برضه ياباشا!!.. حسنين باشا زغلول ده كان صاحب اكبر مصنع معسل في بحرى وكان شعاره دايما لا تشعل السجارة وجرب دخان الحيجارة.. فقفزت ضحكة قويه من حنجرة فارس باشا وقال اه ياأبن الفقريه مش خسارة فيك البريزة ديه.. خد شبرق نفسك.. وجهزلنا فحميتين حلوين عشان معايا حتيتين عاليين جايبهم من مأمور قسم عابدين.. القص دفن البريزة في جيبه وبدأفي تنفيذ الاوامر.. خدامك ياباشا ثواني وكله يبقي في التمام..


القص فط ونط وجهز المززة ودكر بط ..وغسل الجوزة وقشر للباشا موزة وقاله شد يا ريس..فارس شد نفسين جامدين ونفث هواهم الازرق وعينيه من النشوة بتبرق..وقال مش قولتك يابن الفقريه صنف عليوى بشاواتي اصلي..اصل المأمور ده معرفه قديمة من ايام عماد الدين ..فتسأل القص مستفسرا عماد مين ياباشا؟؟ فرد فارس شارع عماد الدين يا قفل..فغمغم القص مستنكرا قسم عابدين وعماد الدين انت اتسطلت من اول حجرين ولا ايه؟؟فلكزة فارس بللي الجوزة وقال بتقول ايه ياأبن المنفسه؟؟ده انا اشرب المحيط..


وتابع فارس كلامه قائلا انت عارف سموني قبضايا ليه؟؟!!..كنت اشهر قبضايا فييك يا عماد الدين..وكانت كلمتي تمشي علي الكبير قبل الصغير وكان الباشا مأمور قسم عابدين ملازم صغير وكنت المرشد بتاعه سبوبه يعني..انا اقوله علي العيال بتوع الشيوعيه و اليساريين اللي بيجوا خمارات عماد الدين وهوه يطنش علي اي خناقه او بلطجه نعملها...وهنا هرش القص في دماغه وقاله لا مؤخذه يا باشا امال ازاى من حياة الليل والكباريهات للسياسة والحركات؟؟!!..فضحك فارس وقال كلها سياسه ..وانا كنت احسن واحد ينفذها..فمثلا الزبون الباشواتي نمشي معاه السياسة الحريرية بتاعة الريس اوباما..نظبطه ونروقه..اما الزبون اللي نشك انه ممكن يعمل قلق نطبق عليه سياسة العصا الحديدية بتاعة الاخ بوش ..وتروحله الفاتورة مع ضلفه من ضلف المحل يدفع علي طول..اما الزبون اللي يعصلج نتبع معاه السياسه الروسيه وياخد دماغين تمام ويتقلب ويترمي علي قارعة الطريق ....القص ضحك وقال ده علي كده تعرف لغات كتير ياباشاااااااااا

ا


واعتدل فارس في قاعدته وبدء في استكمال حديثه.. وفي يوم من الايام دخل علينا المحل واحد من الحيتان الجدد ومعاه شلة من اصحابه و وسط الكلام والهنكرة.. عرفت قصته وان كان شغال في شركة مقاولات وتعرف علي موظف في وزارة الاسكان علي كام موظف من المحافظة ورئاسة الحي... وفطموه علي حكاية تخصيص الاراضي فأسسوا مع بعض شركة وهميه للمقاولات وعليها خدوا حتت اراضي في اماكن مميزة و سقعوها ولما جه وقتها الارض اللي كانت بملاليم اتباعت بملايين.. مكدبتش خبر يا واد يا قص... وتاني يوم رحت لاستاذ حسن احسان المحامي واحد من بتوع الكوبايه اللي بيجوا عندنا المحل.. وخت له قزازة من البرميل وطلبت منه يأسس شركة بأسمي.. تاني يوم ورق الشركه كان عندى.. وعملت الاستاذ حسن المسشار القانوني بتاعي.. وبسرعة اصدت اتنين موظفين من بتوع الاسكان اصحاب المزاج العالي.. وخصصولي اول حته ارض.. اسبوع والتاني بعتها وكان ده اول خمسه مليون عملتهم في حياتي.. فشهق القص و قال اللهم صلي علي النبي.. متصان من عين الحسود يا باشا.. امال لازمتها ايه بقي عضوية المجلس ووجع الدماغ ياباشا.. . تابعونا


فتعازم فارس قبضايا..ورزع القص حتة كف علي قفاه..وقاله امال نحمي الملايين ازاى يا خرونج؟؟لما تحب تحافظ علي ولادك وتعلمهم من صغرهم توديهم فين يا قفص؟؟..فرد القص بعدما فرك قفاه مكان القفا العثمانلي وقال طبعا ياباشا هوديهم الحضانه..فقال قبضايا والملايين لازمها الحصانة..لزوم التكتكه والرزانة...وسيبني اكملك بقيت الحكايه..فرد القص وهويبدء في الرص كمل يا باشا ..ليلتنا فون ان شاء الله..وواصل قبضايا كلامه ..بعد الخبطه الاولي اتغيرت الدنيا خالص واشتريت المحل اللي كنت شغال فيه هتقولي ليه..لسببين لانه وش السعد ولزوم ال فرفشة والنعنشة واصطياد الزباين المهمين..وبعدين عشان افور كل الزمايل القدام عشان ما حدش يفضحنا ويلسن كده ولا كده..تابعوناااااااااااااا


فنظر اليه القص مستنكرا ..وقال موتهم ياباشا!!!؟؟؟؟..فرد عليه فارس لأ يا عبيييييط دى العشره ما تهونش الا علي ولاد الحرام..بس ظبتهم وشغلت كل واحد شغلانة تغنيه عن المحل ونقيت منهم بنتين علي الفرازة لزوم الحركات..وكمان الواد عدوله بطل مصر في حدف الطوب..وبعدين ربنا بارك في السبوبه والخمسه مليون بقوا خمسميه..ونصحني احد اصحاب الحظوة باني اترستق تحت القبه عشان احمي اللحاليح واسبوبة تكبر و اعمل اول مليار..قلت وماله بس المسشار القانوني بتاعي نبهني لان السوابق بتاعتي ممكن تمنعني من الترشيح ..افتكرت مين.. سعدت الباشا مأمور قسم عابدين دلوقتي وكان وقتها عميد في ادارة البحث الجنائي وشرحت له الموضوع..فخدمني خدمة العمر وسلمني ملف جديد لانج مافيهوش الهوا..وللامانه الراجل ما طلبش حاجه لنفسه..راجل محترم بس فيلا للاولاد في الساحل الشمالي عشان المصيف وعربيه زلموكه للمدام..تابعونا


ونعم الرجاله ياباشا بهذه الكلمات هتف القص وهو يواصل الرص ويظبط الحجر ويلقط حتتين مزة كمل ياباشا..ده بتقول اللي مش بتقوله الكتب والمدارس..اما قبضايا فنهش حته من صدر البطايه وهو يكمل الحكايه قائلا المسشار القانوني نصحني انضم للحزب المرضي عنه عشان اضمن النجاح واحط في كرشي بطيخه صيفي وارتاح..اتصلت بيهم في المحل اسألهم عندكوا من الحزب حد مهم...وعشان انا ابن حلال وامي دعيالي..كان واحد مهم جدا من الطبقة العليوى من زباين المحل ..قلتلهم ظبطوه وبعتلوا البت سونيا والبت كرمله وضبوه علي الاخر وحددولي معاه معاد..وفي الميعاد اتقابلنا شرحتيله انا عايز ايه بالظبط..فقالي شوف يا أبو الفوارس انت راجل تتخدم من غير ايه حاجة بس الدايرة اللي انت عايز تترشح فيها نائبها صاحبي وحبيبي وما ينفعش ابيعه جوه الحزب شوفلك دايره تانيه وانا خدامك..قولتله هيه دى خدمتي وبعدين سونيا قالتلي انك مش هتزعلني..رد الباشا وقاللي وعشان خاطر سونيا انا مش هزعلك..بس مش هتنزل علي قايمة الحزب ..تنزل مستقل ولما تنجح تنضم للحزب عا لطول وبكده نضرب عصفورين بحجر سيادتك تنام تحت قبه البرلمان وسونيا ما تزعلش..وكمان ما ابعش صاحبي وحبيبي نائب الدايره الحالي..تابعونااااااااااا


وبعد الحجر الخمساشر ..واصل فارس قبضايا الحكاية قائلا واتفقنا علي انه ممكن يهجمني مهاجمه شرسة لصالح نائب الدايره عشان الحكاية ماتتفقسش..وبرضه الراجل مطلبش حاجة لنفسه..راجل محترم..15 مليون لزوم الرشه الجريئه داخل الحزب..وفيلا للاولاد في مارينا..وعربيه للبنت تروح بيها الجامعة..و طقم الماظ للمدام..وفيلا في المنصوريه للعروسه الجديدة..وبصراحه الراجل طلع اخر احترام ونفذ كلامه بالحرف الواحد ودخلت البرلمان بهيصه و هيلمان..ومن اول يوم بعدما انضميت للحزب تعرفت علي كل الحيتان الكبار..وبقالنا خمساشر سنه تحت القبه..زى الفل وتمام التمام..والحمد لله لا انا من نواب القروض ولا من نواب الكيف ولا من نواب سميحه ولا من نواب التجنيد ولا من نواب العلاج علي نفقة الدولة..وهنا قاله القص انت برنس يا باشا راجل عصامي طلعت السلم سلمه سلمه..وكفايه كده عشان الفحم خلص..خ خخخخخخخخخخخخخخخخخ