فرصة العصر حصرياً في بلاد العرب و طبعاً في بر مصر .. أقوى عروض المساء و السهرة شتاء 2013-2014 .. يسعد أكاديمية سرنجة للحقن الشعبي .. أن تقدم أقوى برامج الحشد الثورى للموسم و كل موسم .. عرض ما حصلش .. عاوز تعتصم .. عاوز تتظاهر ( ما تقلقش ) .. و لو محتاج تتطاهر (الطهارة الثورية ) يا سعدك يا هناك عم قرفص دايماً مستعد .. زى شكة الدبوس .. مع توافر قطع غيار لو تحب .. قطع غيار مش خيار يا ظريف .. يعني ضمير .. ذمة .. شرف .. مواصفات قياسية .. يعني هتخرج من تحت إيديه حاجة تانية .. أو حاجة تالتة و العياذ بالله .. إنت و شوقك .. مساحات مختلفة في أول هايد بارك من نوعه في مصر و العالم العربي و الغربي و بلاد ما وراء المراجيح .. بانوراما رائعة من الأشجار المثمرة و النخيل و نوادر الورد و الزهور .. يعني ورد و فاكهة و بلح و بامبو كمان .. بامبو يا سيدى مش بانجو خليك محترم .. و بالمناسبة الحلو قصب .. عيدان في العضل .. ما علينا .. مصرى .. بحريني .. سورى .. سوداني ( مش مهم ) مساحات متنوعة الإمكانيات و التضاريس .. و كله موجود .. أرجيله .. نرجيلة .. جوزة برطمان .. تومباك .. مضغة .. خدمة أربعة و عشرين حجر .. المهم مزاج سعاتك .. و للعباقرة و المتميزين من السادة النوشا داء السياسيين الصيدلية الأولي من نوعها في عالم السياسة .. إدارة الدكتور فتحي المفك تخصص المُسكنات اللي هيه .. سفوف .. حبوب .. حوقن .. و حتي اللبوس و لا مؤاخذة .. و لهواة الميه السوخنة و الحاجة الأصفره لا تدع الفرصة تفوتك ( هتشرب من كيعانك ) .. عرض خاص للجنس اللطيف من الجنسين .. مانع التحرش .. صاعق كهربي بقوة 2013 وات .. يعني إللي يقرب منك .. و يا يلا بينا نشيل بعضينا .. و ممكن توريني الداخلية ضربوكي فين ؟ هههه الداخلية ( كهربي أومه ) .. سلفي .. شيعي .. إخوان .. أردوغان .. لا تقلق .. أماكن خاصة .. طقوس مميزة .. حواجز أليكترونية منعا ً للإختلاط و درأ ً للفتنة حفاظا ً علي أسرار الإخوة و الأخوات .. علماني .. يسار .. بومبار .. كافيار .. قرب قرب .. و إسأل مجرب .. برامج عالمية معتمدة .. معنا هتشرب الليبرالية في يومين و الشيوعية في كاسين .. والعلمانية علي حتتين .. إلبس الحتة اللي تعجبك .. مصراوى .. شبراوى .. بنهاوى .. قرضاوى .. و الله ما بتفرق معانا الاسماء .. فنحن سنعلمك ( حتة علااااامة ) من أين تؤكل الكتف !!! .. و لو مالكش في الكتف هنوصفلك الزند جامد آخر حاجة و كله بالقانون .. و حصرياً بروجرام خاااااص جداً جداً للسادة الآناركية و هواة اللاسلطوية .. و الملوخية و المهلبية .. مواقع سرية و عفشة ميه و حسنة متغطية .. متخصصون في كل شيء ( هنعلمك الكفُت ) .. و تضرب إيه و فين و أمتي ؟ و السرنجات هدية .. لا حكومة تلم و لا شرطة تهم .. معنا أنت فوق الحكومة .. فوق القانون .. فوق الشجرة .. فوق يا فاروق أحسن أفوقك .. و لو إتقفشت لا تعرفني و لا أعرفك .. شعارنا عيش ندل تموت مستور .. و صباح الخير مساء الخير هنيالك يا فاعل الخير .. مع سرنجة أكاديمي أنت في أيد أمينة و أولادها .. إتصل فوراً علي الارقام أسفل الشاشة ولو مش موجودة .. دور عليها أسفل سافلين .. أو راسلنا علي موقعنا الاليكتروني سرنجة دونت بومب .. بادر بحجز موقعك .. الأماكن محدودة .. البروجرام برعاية أشهر وسائل الإعلام المرئي و المسموع و المقروء .. علي مستوى العالم .. معنا فضيحتك بجلاجل .. بلدك غالية .. بيعها للي يدفع أكتر .. وطنك شرفك ما تفرطش فيه إلا اذا وعدوك بالجواز .. جواز السفر يعني .. ما حدش يفهمني غلط .. جيشك درعك الواقي .. مش هتحتاجه في الشتا (ناشف عليك ) .. ممكن تلبس حاجة تانية .. و بمناسبة الشتا .. إتغطي كويس فالشتا معانا بارد بارد بارد.. تلاتة بارد إختار اللي يعجبك .. مع تحيات أكاديمية سرنجة للحقن الشعبي .. ملحوظة صغيرة .. رجاء الحفاظ علي الأداب العامة و مراعاة الذوق العام .. و تنظيف المكان بعد إنتهاء البروجرام .. و ليكن شعارنا دائما .. الوطنية أدب مش هز إكتااف
ليست هناك تعليقات:
إرسال تعليق